Gidaritza autonomoaren inguruko interesa robotaxien ekoizleetatik haratago doa: garraio partekatuko enpresek (Uber, adibidez), ekoizle tradizionalek (Mercedes-Benz eta Volkswagen, esaterako) eta erraldoi teknologikoek (Nvidia, esate baterako) milioi askoko merkatua ikusten dute teknologia horretan. Zenbatespenen arabera, gidaritza autonomoa bilioi batetik gora dolarreko industria izan liteke Estatu Batuetan baino ez, bidaiarien garraioagatik eta ibilgailuen ekoizleei nahiz flota logistikoei softwarea saltzeko aukeragatik.

Robotaxiek darabilten teknologiak sentsore aurreratuak (kamerak, radarrak eta mikrofonoak) uztartzen ditu unean bertan informazio konplexua prozesatzen duten adimen artifizialeko sistemekin. Datuak metatu egiten direnez eta AAko eredu multimodalek gora egin dutenez, enpresek euren algoritmoak etengabe hobetzea lortu dute. Edonola ere, sistema horiekiko konfiantza ahula da: nahiz eta azterlanetan robotaxiak giza gidariak baino seguruagoak izan daitezkeela egiaztatu den, ezbehar larriek (Cruiseko ibilgailuarekin gertatutakoa, adibidez) haien ezarpena moteldu dezakete, eta araugintzako jarduketak sorrarazi ditzakete.

Oraindik ere erronka ekonomikoa handi-handia da, ordea. Gidaria kentzean kostuak murrizten omen diren arren, gaur egungo robotaxiak oso garestiak dira haien sentsore, txip eta premia eragileengatik. Gaur egun, miliako zenbait dolarretako kostua dutenez, garraio-zerbitzu tradizionalen eta auto partikularren gain-gainetik daude (ibilgailu autonomoek miliako 7-9 dolarreko kostua dute, garraio partekatuko zerbitzu tradizionalen miliako 2-3 dolarreko kostuaren aldean). Kostu horiek murrizteko, hardware merkeagoa erabili behar da, negozio-ereduak eraginkorragoak izan behar dira eta flotetako operadoreekin egin behar dira aliantzak. Prozesu horrek, ordea, hamarkada bat iraun dezake, McKinseyk eta antzeko aholkularitza-enpresek aurreikusi dutenez.

Merkatuaren etorkizunari dagokionez, badirudi Waymo lehenengo postuan dagoela 4. mailako teknologiari eta segurtasunean oinarritutako ikuspegiari esker. Teslak, ordea, hardware gutxiagoko eta software gehiagoko estrategiaren aldeko apustua egin du. Uber bezalako enpresek, ordea, robotaxietarako plataforma liderrak izan nahi dute, eta Nvidia bezalako konpainiak funtsezko onuradun moduan sendotzen ari dira, AAko tresnak eta txipak hornitzen dizkiotelako industria osoari. Errentagarritasuneranzko bidea ziurgabea bada ere, iraultza autonomoan nagusi izateko lehia hasi baino ez da egin.

LAVANGUARDIA.COM