Adimen artifizial agentzialaren bidez bultzatutako automatizazioak, konputazio kuantikoko aurrerapenek, bioteknologiako berrikuntzek eta teknologia termokimikoen garapenak 2026rako joera teknologikoen mapa nagusia eratzen dute, Eurecaten aurreikuspenen arabera. Bilakaera-fasean dauden teknologia horiek sektore industrial eta ekonomiko estrategikoetan sendotzen hasiko dira.

Zentro teknologikoko Daniel Casellas zuzendari zientifikoak azpimarratu duenez, enpresei aldaketa horiei aurrea hartzen laguntzea da Eurecaten lehentasunetako bat. Horretarako, irtenbide berritzaileak eta eragingarriak ezarriko dira, diziplina anitzeko talde zientifikoaren jakintza kontuan hartuta.

Arlo digitalean, adimen artifizial agentzialaren heldutasun-maila handiagoa izango da, eta webgune agentziala garatzen hasiko da. Interneteko arkitektura berria izango denez, AAko agenteen arteko elkarreragin automatizatu eta segurua lortuko da. Aldi berean, konputazio kuantikoak aurrera egingo du zenbait sektoretan dituen lehenengo ezarpen praktikoetarantz; esate baterako, farmaziagintza, finantzak edo logistika. Horrez gain, kriptografia postkuantikoranzko iragaitza ere azkartuko da.

AAk eta robotikak bat egiten dutenean, adimen artifizial fisikoaren hedapena bultzatuko da, eta antzemateko, arrazoitzeko eta jarduteko gaitasuna izango du benetako munduan, roboten, ibilgailu autonomoen edo sistema industrialen bidez. Ikuspegi horrek oso eragin nabaria izango du industrian, gaur egun bertan algoritmo berri horiek erabili ditzaketen robot ugari daudela kontuan hartuta.

Jasangarritasunari dagokionez, teknologia termokimikoak, pirolisia eta gasifikazioa, esaterako, funtsezko irtenbideak dira hondakin konplexuen kudeaketarako eta deskarbonizaziorako. Horri esker, balio energetikoa duten bioerregaiak, biomaterialak zein gasak lortzen dira, eta ekonomia zirkularrerantz egiten da aurrera.

Azkenik, bioteknologiak gero eta pisu handiagoa izango du berriro zenbait arlotan; esate baterako, elikagaigintza, osasuna eta industriako prozesuak. 2026an, adimen artifizialaren, teknologia omikoen eta elikagaigintzaren integrazioa areagotuko denez, zenbait arlo bultzatuko dira; adibidez, proteina alternatiboak, doitasunezko hartzidura eta diagnostiko biomediko aurreratua.

eurecat.org