Greenpeace erakundearen datuen arabera 2020an urteko 500 milioi tonatik gora plastiko ekoitziko ditugu, hau da, 1980an baino %900 gehiago. Kopuru beldurgarriak dira, are gehiago kontuan izanik erabat murgildurik gaudela klima aldaketaren aurkako eta gure ingurune naturala babesteko borrokan. Hala ere, ezin dugu plastikorik gabe bizi: gure eguneroko bizitzako oinarrizko materiala da, bere propietateengatik eta prezioagatik erabiltzen baita askotariko produktuak egiteko, hasi botiletatik eta arropetaraino.

Horregatik, errealista izan behar dugu; kontua ez da plastiko gehiago ez erabiltzea, baizik eta ekonomia zirkularraren printzipioak aplikatzea plastikoa sortzeko prozesuan. Printzipio horiek diote, batetik, birziklatu egin behar dela produzituta dagoen plastikoa eta, bestetik, bio-plastiko berriak sortu behar direla, aurrekoen funtzio berberak izango dituztenak baina ingurumenean arazorik sortuko ez duten osagaiez eginak.

Bigarren proposamen horri jarraiki, Euskadin asmo handiko proiektu bat sortu da: bio-plastikoa egin nahi da abeltzaintzako kolageno soberakina erabiliz. Gainera, nekazaritza eta abeltzaintzatik ateratako beste hondakin batzuk ere erantsi dakizkioke, nahasketa espezifiko desberdinak egiteko erabilpen industrial desberdinentzat. Jesus Olloquieguik, Ekolber enpresako I+G+B-ko arduradunak, ideia nola sortu zen azaldu dio INNOVADORES aldizkariari: “ikerketa bat egiten ari nintzen plastiko eta kortxoei buruzko prestakuntza-zikloko nire ikasleekin. Bagenuen esperientzia apur bat kolagenoarekin eta erabaki genuen aztertzea jakiteko plastiko modura erabili zitekeen. Urte askoren buruan lortu duguna da termoplastiko edo kautxu bezala funtziona dezala jartzen zaion plastifikantearen arabera”.

innovadores.larazon.es