Beroaren aurkako borrokak arrasto sakona uzten du energiaren fakturan. Estatu Batuetan, ekoizten den argindarraren %6 inguru erabiltzen da etxe nahiz bulegoetako tenperatura aire girotuaren bidez jaisteko. Kontsumo hori zenbakitan jarriz gero, esango genuke urtean 29.000 milioi dolar gastatzen direla, kontuan hartu gabe ingurumenean duen inpaktu kalkulaezina. Massachusetts Institute of Technology (MIT) zentroko ikertzaile talde batek produktu berri bat asmatu du, zeinak nabarmen murriztuko baitu aire girotua pizteko beharra.

Ikertzaileek beste ikuspegi batetik aurre egin nahi izan diote beroaren arazoari. Hala, beroari etxe barruan aurre egin beharrean, proposatu dute ez uztea beroari etxera sartzen, horretarako murriztu egin beharko liratekeelarik leihoetatik iragazten diren zuzeneko edo zeharkako eguzki izpiak (horixe da eguzkiak sortutako beroaren sarbide nagusia). Ikertzaileek modu adimentsu bat aurkitu dute gelak ez daitezen gehiegi berotu udan, baina aldi berean behar adina eguzki sartu dadin neguan. Hau da, eguzkiaren onena aprobetxatzeko gehien behar denean eta gehiegizko beroa saihesteko beharrezkoa ez denean.

Arazo hori konpontzeko film garden bat sortu dute, leihoetan itsasten dena eta eguzki-izpiei pasatzen uzten diena kanpoko tenperatura 32 gradukoa den bitartean. Tenperatura hori gaindituz gero, filmak ez dio uzten sartzen beroari, eguzki izpiak errefusatzen dituelako. Sistema honen alderdi onena da guztiz autonomoa dela, hau da, gizakiaren esku-hartzerik gabe eta inolako sistematara konektatu gabe funtzionatzen duela.

Behin leihoetara itsatsitakoan, filma gai da eguzkiak sortutako beroaren %70 blokeatzeko eta horrela aire girotuan aurrezteko. Ikertzaile taldeak kalkulatu du film horrekin eraikin batek %10 inguru murriztu dezakeela bere argindar kontsumoa. Ez dirudi oso kopuru handia, baina eskala handian begiratuz gero, eta kontuan izanik autonomoki funtzionatzen duela, irabazi handiak sor ditzake.

elpais.com