Pintura adimendunak eta berez konpontzen direnak

Estalduren arloan garatzen ari diren berrikuntza nagusien artean, pintura adimendunak eta berez konpontzen direnak nabarmentzen dira, eta behar besteko ahalmena dute ingurumeneko baldintzetara egokitzeko eta kanpoko agenteek sorrarazitako kalteak konpontzeko; esate baterako, marrak, arrakalak edo korrosioa.

Fabrikazio adimenduna eta konputazio kuantikoa

Pinturaren industria goitik behera aldatzen ari den beste joera bat adimen artifiziala eta konputazio kuantikoa produktuen fabrikaziorako eta diseinurako prozesuetan ezartzea da. Teknologia horiei esker, baliabideak hobeto erabiltzen dira, kostuak murrizten dira, kalitatea hobetzen da, produktuak pertsonalizatzen dira eta merkaturatzeko denbora azkartzen da. Esate baterako, adimen artifiziala lagungarria izan daiteke eskaria aurreikusteko, kalitatea kontrolatzeko, akatsak antzemateko edo pinturen formulazioa hobetzeko orduan.

Bestetik, konputazio kuantikoak kalkulatzeko ahalmen handia behar duten arazo konplexuak konpondu ditzake; esate baterako, materialen ezaugarrien simulazioa, pigmentu berrien diseinua edo hornikuntza-kateen optimizazioa.

Konbergentzia digitala eta biki digitalak

Konbergentzia digitala pinturaren industriako produktuekin eta zerbitzuekin elkarreragiteko modua eraldatzen ari den beste joera bat da. Teknologiak integratzea da helburua; esate baterako, errealitate areagotua, errealitate birtuala edo esperientzia murgiltzaileak, benetako munduarekin gainjarri edo nahasten diren ingurune birtualak sortzeko aukera eskaintzen dute-eta. Teknologia horiei esker, errazagoa da produktuak bistaratzea, probatzea eta hautatzea, baita haien inguruko prestakuntza, laguntza eta artapena eskaintzea ere. Joera horren adibide bat biki digitalak dira, hau da, benetako objektuen edo prozesuen erreplika birtualak. Izan ere, unean bertan eguneratzen dira, eta haien portaera simulatzeko, aztertzeko eta hobetzeko aukera ematen dute.

interempresas.net