Badirudi adimen artifiziala (AA) behin betiko tresna dela, Europar Batasunak bere lehiakortasun globala berreskuratu dezan. Europako Inbertsioen Bankuko (BEI) datuen arabera, AAren eta datuen analitikaren erabileraren ondorioz, 2019tik erregistratutako emankortasuna %12 gehitu da. Edonola ere, lidergoranzko bidea egiturazko oztopoz eta oztopo finantzarioz beteta dago.

Inbertsio-arrakala eta eredu arautzailea

EBrentzako oztopo nagusia kapitalean dagoen desberdintasuna da. 2024an, AEBk AAn egindako inbertsio pribatua 109.100 milioi dolarrekoa izan da, Europar Batasuneko 8.000 miloi urrien aldean. Alde hori hiru eredu desberdinen ondorioa da, hain zuzen ere:

• AEB: bertan, merkatua eta enpresa teknologiko handiak dira nagusi.
• Txina: bertan, estatuko plangintza estrategikoa izan da bultzatzailea.
• Europa: bertan, arauketa, pribatutasuna eta burujabetza digitala dira xede nagusiak.

Sektore liderrak eta ezarpen desberdina

AAren ezarpena ez da homogeneoa. Besteak beste, honako hauexek dira onura handiena lortzen ari diren sektoreak: zerbitzu finantzarioak, manufaktura, osasuna eta azpiegitura kritikoak. Siemens Energy edo Roche bezalako enpresa tradizionalak AA erabiltzen ari dira euren prozesuak modernizatzeko. Beste herrialde batzuk, ordea, Finlandia eta Herbehereak, esaterako, aurretik doaz enpresen arloko ezarpenean (%55 baino gehiago), beste herrialde batzuen aldean; adibidez, Grezia edo Italia (%20 baino gutxiago).

Gainditu beharreko oztopo kritikoak

AA Europako ekonomiaren benetako “filosofoen harria” izan dadin, adituek premiazko zenbait erronka gainditu behar direla aipatu dute:

• ETE-en arloko ezarpen handiagoa: enpresa handien %44k AA darabilten bitartean, enpresa txiki eta ertainen %28k baino ez darabilte.
• Azpiegitura: inbertsio handi-handia egin behar da datuen zentroetan eta burujabetza energetikoan.
• Malgutasuna: arriskuak ezinikusia sorrarazten duenez eta Europako lan-merkatu batzuk zurrunak direnez, zaila da azkar automatizatzea, estatubatuarra bezalako eredu arinagoen aurrean.

Aukera europarra

Atzerapenak atzerapen, Europak badu abantaila lehiakorrik: esparru arautzaile egonkorra, erdieroaleetarako makinen fabrikazioko lidergoa (ASML bezalako enpresak, adibidez) eta gero eta deskarbonizatuago dagoen sare energetikoa. Arrakasta lortzeko, funtsezkoa izango da datu industrialen kopuru eskerga aktibo estrategiko bihurtzea, bere pribatutasun-estandarrak arriskuan jarri gabe.

cincodias.com