Ikerketaren ondorio nagusien artean, azpimarratzekoa da enpresaren tamaina, manufaktura-industriako jarduera eta digitalizazio-maila direla berrikuntza gehien errazten duten faktoreetako batzuk. Ildo horretan, teknologia aurreratuak erabiltzeak, hala nola hodeiko zerbitzuak edo zibersegurtasuneko soluzioak, jarduera berritzaileak garatzeko aukera handiagoarekin lotzen da.

Enpresen hainbat profil ere identifikatzen ditu txostenak, haien ezaugarri eta portaera berritzailean oinarrituta. Talde horiei esker, hobeto uler daitezke euskal enpresa-sarearen aniztasuna eta sektorearen, lurraldearen eta berrikuntza-mailaren arabera elkarrekin bizi diren errealitateak.

Era berean, azterketak agerian uzten du industria-enpresa berritzaileenek inbertsio eta kostu handiagoak hartzen dituztela beren gain epe laburrean, eta horrek marjinak murriztu ditzake aldi baterako. Hala ere, erakunde horiek produktibitate-maila handiagoak eta errentagarritasun positiboa dituzte, eta, horrela, lehiakortasuna eta epe ertain eta luzera hazteko gaitasuna indartzen dituzte.

innobasque.eus