2018ko Osloko Eskuliburuak* argitaratutako Berrikuntzaren definizio berriaren arabera, eta kontuan hartzen badugu jarduera berritzaileak direla enpresa batek finantza, garapen nahiz merkaturatze arloetan garatzen dituenak eta berrikuntza bat sortzea helburu dutenak edo dagoeneko berrikuntza bat sortu dutenak, orduan aipatu behar dugu Bizkaiko 10 langile edo gehiagoko establezimenduen % 17,3k berrikuntzako jardueretan gastatu dutela 2018an.

Berrikuntza produktu/prozesuan

Produktu edota prozesuko berrikuntzaz ari bagara, aipatzekoa da 2018an Bizkaiko enpresen % 28,4k berrikuntzaren bat garatu zutela. Esan behar da establezimenduaren tamainak eragina duela produktu edota prozesuan berritzeko gaitasunean, eta zenbat eta handiagoak izan, orduan eta gehiago berritzen dutela.

Berrikuntza produktuan

Soilik produktuko berrikuntza hartzen badugu kontuan –merkatuan sartu diren ondasun edota zerbitzu berriak edo hobetuak-, Bizkaiko 10 langile edo gehiagoko establezimenduen % 18k arlo horretako berrikuntzak egin dituzte 2018an, Bizkaiko industria sektorea delarik horrelako berrikuntzetan portzentaje altuena duena (% 26,9). Gainera, produktu/zerbitzu arloko berrikuntza gehienak establezimenduan bertan egiten dira (%36,5).

Berrikuntza prozesuetan

Negozio-prozesuetan eginiko berrikuntzei dagokienez (prozesuko berrikuntza bat da negozio-prozesu berri edo hobetu bat negozioaren funtzio batentzat edo gehiagorentzat, establezimenduak lehenago erabiltzen zuen prozesutik oso desberdina dena eta establezimenduan inplementatu dena), Bizkaiko 10 langile edo gehiagoko establezimenduen % 26,3k -bere produkzio-sektorea gorabehera- prozesuetan berritu zuten.

Lankidetzan eginiko berrikuntza

Inkestako datuek diote lankidetza tresna ona dela enpresetan jarduera berritzaileak garatzeko. Hala, Bizkaian berrikuntzak sortzen dituzten establezimenduen % 12,4k I+G-ko jardueren inguruko lankidetza-hitzarmenak izenpetu dituzte beste enpresa edo erakunde batzuekin 2016-2018 aldian.

Berrikuntzarako zailtasunak

Aztergai dugun inkestaren arabera, 2018. urtean Bizkaiko enpresen % 61,3k eragozpenen bat aurkitu dute beren berrikuntza jardueran.

Arazo nagusia izan da enpresa barruan beste lehentasun batzuk izatea (% 43,8), eta arazo horren ostean datoz ekonomiarekin lotutako faktoreak.

Berrikuntza babesteko sistemak

2016-2018 urteen artean, Bizkaiko establezimendu berritzaileen % 11,9k patenteren bat eskatu dute beren asmakizunak edo berrikuntzak babesteko.

Bestelako babesei dagokienez, enpresa berritzaileen % 3,6k marrazki edo eredu industrialen bat erregistratu dute, % 11,3k markaren bat, % 2,1ek egile eskubideak erreklamatu dituzte eta % 3,4k sekretu komertzialak erabili dituzte.

* 2018. urteko Berrikuntza Inkesta egiteko, Osloko Eskuliburuaren 2018ko bertsio berria erabili da, eta horrek esan nahi du haustura bat dagoela orain arteko sailarekin, metodologia aldatu egin delako. Horregatik, argitaratu diren 2018ko datuak ezin dira alderatu aurreko urteetan argitaratutakoekin.